Alle Neune!

 

 

Zagg, war de Rungkl von den Kerl ab un hullerde de ganse Bahn ronger!

 

S gibd dahier awer au noch ne gans annere Saache, wie dar Diebsstiech zu sein’ Nam’ gekomm’ is: S war au zum Ende vom fuffzehndn Jahrhunnerd rom, wiee Dieb un Mörder offn Galchnberch geköbbfd solld weer. Alsu hamm’ dar Hengker un sinne Knechde gefessld da noff zur Richdstäddn geschlebbd.

 

Der Kerl hadde sech schonn henggeknied, un dar Hengker wolld grad sein Schwerd vorbereidn un gegugg, obbsn au werglech scharf genuch is, als der Halungke off eima sinne Fessln zarrobbfd hadd, offgesprungn is un wiee Närrscher dn Galchnberch rongerrasde. Un noch ehr dar Hengker un sinne Helfer wußdn, was eichndlech rechdch los war, is dar Dieb schonn midde anständchn Vorsprung in Richdung Remmschd, was jas näsde Dorf is, abgehaun. Weil da war grad au Kermse, un dar Dieb hadd nunne gedachd, dassn in den Gewühle eh kinner kann find, un ar desderweechn sicher is. Alsu isse gans unbesorchd off de Keechlbahn gegangn un hadd da eimfach midgespield. Un ar hadd jedesmal alle Neune abgeräumd! Jeja, eimfach ungglaublech, ge?

 

Awer middlerweile haam sech dar Hengker un sinne Knechde au von dar erschdn Üwerraschung arhold gehabbd un sen dn Dieb üwer dn Feldweech, der seiddeen ehm Diebsstiech heißd, nach Remmschd nachgerannd. Uns hadd au garnech su lange geduerd, bissn dordhier off dar Keechlbahn gefundn haddn. Awer fischeland wie dar Hengker war, hadde erschdema gar kinn’ Deebs gemachd, sondern sech gans leise von hengne an den Dieb ranggeschlichn. Na der hadd nadürlech üwerhaubd nüschd gemerchd, weile sech schonn for dn näsdn Schub vorbereided hadd. Daderbie stand dar Hengker gans dichd hinder ihn un hadd schonn mächdch mid sein’ Schwerd ussgehold.

 

Un grad wie dar Dieb widder alle Keechl abräumd un de Lüüd off dar Keechlbahn „Alle Neune!“ grehldn, hadde zugeschlaachng. Zagg, war de Rungkl von den Kerl ab un hullerde de ganse Bahn ronger! Un su hadder Dieb am Ende donnoch sinne gerechde Strafn gekrichd.

 

Zur voorchn SaacheZur näsdn Saache

Besucher gesamt: 128.776 / Besucher heute: 53 / Besucher gestern: 50