Herzooch Ernsd bannds Feuer

 

 

Wennsema erchndwo gebrannd hadd, is Herzooch Ernsd offe wissn Schimml eimfach dreima oms Feuer drommeromgeriddn, hadd e baar geheimnisvolle Zauwerformln gebrammld, un schonn hadd sechs nech weider ussgebreided.
 
Unsern Herzooch Ernsd n Zweidn von Saggsn-Gohde-Aldnburch hammse je sein Lehm lang immer nachgesaachd, dasse e Feebl (Ge, da guggde! Ech kann sogar ussländsch geschwatz!) for erchndwelje geheim’ Sachng hadde. Ernsd dar Zweide is übrichns dar Ur-Ur-Engkl von Ernsd n Fromm’, ders Schloß Friednstein gebaud hadd. Nur dadermidder au wissd, von weme dahier eichndlech schwatzn, ge!

Un Ernsd dar Zweide war under annern Großmeisder von dn Freimaurern un hadd wo au erchndwelje Varbindungn zu dn Illuminadn gehabbd. Awer das arkleer ech euch jetz nech au noch, wer oder was de Illuminadn und Freimaurer sen! Da würdme je morchn nonnech ferrdschd dahier. Das kennde gefällechsd selwer inne Lexikon nachgeles, dadermidde auema was lernd!

Weider jetze: Mer arzehld sech, daß Ernsd dorch geheime Kräfde un Magie s Feuer konnd „varsprech“. Das heißd, er konnd machng, dasses offheerd. Wennsema erchndwo gebrannd hadd, is dar Herzooch offe wissn Schimml eimfach dreima oms Feuer drommeromgeriddn, hadd e baar geheimnisvolle Zauwerformln gebrammld, un schonn hadd sechs nech weider ussgebreided! Awer dadernach mußder au glei wechgereid un schnell ans annere Ufer vom näsdn Bach oder Deich komm’ – sonsd weern’ de Flamm’ hengerhergeschlaachng un häddn’ omgebrachd.

Su gans geheuer war dn Goodschn das nadürlech nech, awer se haddn e Heidnreschbeggd vor Herzooch Ernsd un sein’ Wissn. Un daderdrom isse schonn ze Lebziedn von alln au ümmer nur „dar Weise“ genannd wordn.

 

Zur voorchn SaacheZur näsdn Saache

Besucher gesamt: 139.493 / Besucher heute: 15 / Besucher gestern: 54