Dar Deufl in dar Körchn

 

 

Wie Ludder geechn dn Babsd, de Goddlosichkeid un de Sündn gewedderd hadd, hadd derweil dar Deufl vor lauder Wud, dassn Ludder grad su viele Seeln wechgenomm’ hadd, Steine uss dar Mauer gerobbfd un se ronger ins Körchnschüff gekladdschd..

 

Wie ema dar berühmde Reformader Mardin Ludder offn Weech zum Reichsdaach nach Worms gewesn is,da hadde au in Gohde Hald gemachd. Dn achdn Abril Fuffznhunnerdein’zwannsch waars. Jeja, als Goodscher kamme sowas ruich wiss, alsu mergds euch. Wehnsdns s Jahr! Fuffznein’zwannsch. Menschnskinner, dahier das is werglech wichdche deudsche Geschichde! Ludder, wiee in Worms vor Kaiser Karl n Fümfdn stehd un saachd: „Dahier steh ich jetze un kannech annerschder!“

Na gud, weider gehds: Wieme alle wissn, is Ludder ja e ziemlech guder Freund vom Friddrich Myconjus gewesn, der dahier in Gohde Suberindndend war, un ar kannde de Stadd au schonn von früern Besuchng. Ludder is je insgesamd siehmmal in Gohde gewesn! Jeja, da guggde, ge? Das hadd sech nadürlich rabbzabb in dar Stadd romgesprochn gehabbd, dass dar große Reformador da is un au in dar Augusdinerkörchn breedchn würd. Halb Gohde war zesamm’gelaufm un de Körchn gerammldevoll bis ungers Dach. S weern üwerhaubd garnech mehr Lüüd niengegangn! Un alle heerdnse gans gespannd off das, was Ludder saachde. Der konnd awer au redn, mein liewer Herr Gesangsvarein!

Un wiee su geechn dn Babsd un de Goddlosichkeid un de Sündn gewedderd hadd, hadd derweil dar Deufl im Wesdgiewl gehoggd un sech schwarzgeärcherd, weiln dar Doggder Ludder grad su viele Seeln wechgenomm’ hadd. Rechdch wudich isse gewordn, dar Deufl. Un desderweechn hadde au mid laudn Gebolder e baar riesngroße Steine uss dar Mauer gerobbfd un se ronger ins Körchnschüff gekladdschd – su schlümm haddn dar Ludder geärcherd. De Goodschn haddn nadürlech ordnlech Schiss, wie die Wagger da rongergefloochn kam’, awer Goddseidangk is kinner gedroffn wordn. Un Mardin Ludder konnd unggestörd sinne Bredichd ze Ende arzehl.

  

Zur voorchn SaacheZur näsdn Saache

Besucher gesamt: 130.390 / Besucher heute: 47 / Besucher gestern: 62